Julian Alvarez afunguka kuhusishwa kutua Barca,Arsenal na Chelsea.

Mshambuliaji wa Atletico Madrid Julian Alvarez amekiri kuwa hana uhakika kama bado atakuwa mchezaji wa Atletico Madrid msimu ujao, huku akihusishwa na uhamisho wa kwenda Barcelona na Arsenal.

Licha ya juhudi za klabu kupunguza uvumi wa kuondoka kwake, mshambuliaji huyo wa kimataifa wa Argentina alikataa kutoa jibu la moja kwa moja kuhusu mustakabali wake baada ya kuonyesha kiwango bora dhidi ya Tottenham Hotspur katika mchezo wa Ligi ya Mabingwa Ulaya.

Mshindi huyo wa Kombe la Dunia ametajwa kama lengo kuu la Barcelona, ambao wanaripotiwa kumwona kama mrithi bora wa Robert Lewandowski. Wakati huo huo, Arsenal na Chelsea pia wametajwa kuwa na nia ya kumsajili.

Uvumi wa uhamisho uliongezeka baada ya usiku wa kihistoria kwa Atletico Madrid, ambao walitumia vyema makosa mengi ya wachezaji wa safu ya ulinzi ya Tottenham Hotspur. Kikosi cha Igor Tudor kilikuwa nyuma kwa mabao 3–0 ndani ya dakika 15 za mwanzo baada ya kipa Antonin Kinsky kuanza vibaya sana.

Alvarez  alifunga mabao mawili yaliyosaidia karibu kumaliza kabisa mchezo wa hatua ya 16 bora, huku timu ya nyumbani hatimaye ikishinda kwa mabao 5–2 katika mechi ya kwanza.

Alipoulizwa kuhusu mustakabali wake, alisema:
"Labda ndiyo, labda hapana huwezi kujua. Nina furaha sana hapa. Ni swali ambalo linaendelea kuulizwa, lakini nina furaha. Nimejikita kwenye kazi ya kila siku, nikijitahidi kuboresha na kutoa kila nilicho nacho. Sijawahi kusema kitu kibaya kuhusu klabu. Ninashukuru sana. Watu wamenionyesha upendo wao, na nina furaha sana."Amesema Alvarez.