Rais Msumbiji kufanya ziara Tanzania

Rais wa Msumbiji Daniel Francisco Chapo anawasili Tanzania Jumatano kwa ziara ya kiserikali ya siku tatu inayotarajiwa kuimarisha uhusiano baina ya nchi hizo mbili.

Ziara yake inatarajiwa kuweka msingi imara wa ukuaji wa uchumi, usalama wa kikanda na uwekezaji wa kigeni.

Hii ni ziara ya kwanza rasmi ya Rais Chapo nchini Tanzania na ya pili tu nje ya nchi yake tangu ashike madaraka Januari. Alitembelea Afrika Kusini mwezi Machi.

Akiwa nchini Tanzania, Rais Chapo atafanya kikao baina ya nchi hizo mbili na mwenyeji wake, Rais Samia Suluhu Hassan, na kuhutubia waandishi wa habari na kushuhudia utiaji saini wa mikataba mbalimbali ya ushirikiano baada ya hafla hiyo ya kuwakaribisha rasmi.

Pia atatembelea Kituo cha Urithi wa Ukombozi wa Afrika ili kupata ufahamu kuhusu historia ya ukombozi wa bara hilo. Rais Chapo pia amepanga kuzuru Stesheni ya Reli ya Standard Gauge (SGR) jijini Dar es Salaam na pia kufanya ziara rasmi Zanzibar.

Ziara hiyo siyo tu ni ishara ya uhusiano wa kihistoria kati ya majirani hao wawili bali pia ni hatua ya kimkakati ya kidiplomasia inayolenga kuharakisha mipango ambayo haijakamilika chini ya mtangulizi wake, Filipe Nyusi.

Kiini cha majadiliano kati ya marais Hassan na Chapo ni dhamira ya pamoja ya kufufua biashara baina ya nchi, kuimarisha miundombinu ya mipakani na kushughulikia matishio ya usalama katika kanda.